apni dhun mein hun KHayal-e-ma-siwa se kya gharaz

apnī dhun meñ huuñ ḳhayāl-e-mā-sivā se kyā ġharaz

āshnā se kyā ġharaz nā-āshnā se kyā ġharaz

baat kuchh dil kī sunī ai nisbat-e-zāt-o-sifāt

ho butoñ se be-niyāzī to ḳhudā se kyā ġharaz

zindagī kā avval-o-āḳhir thī vo pahlī nazar

ibtidā se kyā ta'alluq intihā se kyā ġharaz

mudda'ā-āmoz hai husn-e-tamannā āfrīñ

is dil-e-be-mudda'ā ko mudda'ā se kyā ġharaz

'umr bhar us kī jafā ko ham vafā samjhā kiye

kyā ḳhabar vābasta thī us bevafā se kyā ġharaz

husn-e-mustaġhnī kī ham ne baat rakh lī ai 'zahīn'

varna 'ishq-e-be-ġharaz ko iltijā se kyā ġharaz

apni dhun mein hun KHayal-e-ma-siwa se kya gharaz

aashna se kya gharaz na-ashna se kya gharaz

baat kuchh dil ki suni ai nisbat-e-zat-o-sifat

ho buton se be-niyazi to KHuda se kya gharaz

zindagi ka awwal-o-aKHir thi wo pahli nazar

ibtida se kya ta'alluq intiha se kya gharaz

mudda'a-amoz hai husn-e-tamanna aafrin

is dil-e-be-mudda'a ko mudda'a se kya gharaz

'umr bhar us ki jafa ko hum wafa samjha kiye

kya KHabar wabasta thi us bewafa se kya gharaz

husn-e-mustaghni ki hum ne baat rakh li ai 'zahin'

warna 'ishq-e-be-gharaz ko iltija se kya gharaz