apni ghazal ke tair-e-KHun-nab ke liye

apnī ġhazal ke tā.ir-e-ḳhūñ-nāb ke liye

kuchh zaḳhm le ke aayā huuñ ahbāb ke liye

phir yuuñ huā ki daaġh hī hāthoñ meñ rah ga.e

rasta banā rahā thā maiñ mahtāb ke liye

muddat se phir rahā huuñ maiñ bāzār-e-shauq meñ

ik lafz kī talāsh hai ādāb ke liye

ḳhushbū shabāb husn ye dhoka hī ik sahī

kuchh to bahāna chāhiye zahrāb ke liye

itnī to aag dil meñ hī jaltī hai rāt-din

jis darja aag chāhiye zar-nāb ke liye

insāniyat ke naam bhī kuchh kar ke dekhiye

har kaam lāzmī nahīñ surḳhāb ke liye

'ḳhālid' harā-bharā vo rahe bhī to kis liye

har phuul jis shajar kā ho girdāb ke liye

apni ghazal ke tair-e-KHun-nab ke liye

kuchh zaKHm le ke aaya hun ahbab ke liye

phir yun hua ki dagh hi hathon mein rah gae

rasta bana raha tha main mahtab ke liye

muddat se phir raha hun main bazar-e-shauq mein

ek lafz ki talash hai aadab ke liye

KHushbu shabab husn ye dhoka hi ek sahi

kuchh to bahana chahiye zahrab ke liye

itni to aag dil mein hi jalti hai raat-din

jis darja aag chahiye zar-nab ke liye

insaniyat ke nam bhi kuchh kar ke dekhiye

har kaam lazmi nahin surKHab ke liye

'KHalid' hara-bhara wo rahe bhi to kis liye

har phul jis shajar ka ho girdab ke liye