apni haalat par hi sharminda hun main

apnī hālat par hī sharminda huuñ maiñ

ye na pūchho kis tarah zinda huuñ maiñ

har jagah tanhā nazar aatā huuñ jab

kaun sī bastī kā bāshinda huuñ maiñ

tum ḳhalāoñ meñ hī ab DhūñDā karo

chāñd sūraj kā numā.inda huuñ maiñ

mujh ko suulī par chaḌhā sakte nahīñ

maiñ sadā huuñ aur sadā zinda huuñ maiñ

Duub kar niklūñgā sūraj kī tarah

yaad rakkho nasl-e-ā.inda huuñ maiñ

maiñ huuñ zau detā huā ik āftāb

soz se ḳhud apne tābinda huuñ maiñ

dushmanoñ se kahtī hai urdu zabāñ

kyā miTāoge ki pā.inda huuñ maiñ

apni haalat par hi sharminda hun main

ye na puchho kis tarah zinda hun main

har jagah tanha nazar aata hun jab

kaun si basti ka bashinda hun main

tum KHalaon mein hi ab DhunDa karo

chand suraj ka numainda hun main

mujh ko suli par chaDha sakte nahin

main sada hun aur sada zinda hun main

Dub kar niklunga suraj ki tarah

yaad rakkho nasl-e-ainda hun main

main hun zau deta hua ek aaftab

soz se KHud apne tabinda hun main

dushmanon se kahti hai urdu zaban

kya miTaoge ki painda hun main