apni hasti ko miTa dun tere jaisa ho jaun

apnī hastī ko miTā duuñ tire jaisā ho jā.ūñ

is tarah chāhūñ tujhe maiñ tirā hissa ho jā.ūñ

pā.eleñ bāñdh ke bārish kī karūñ raqs-e-junūñ

tū ghaTā ban ke baras aur maiñ sahrā ho jā.ūñ

duur tak Thahrā huā jhiil kā paanī huuñ maiñ

terī parchhā.īñ jo paḌ jaa.e to dariyā ho jā.ūñ

shahr-dar-shahr mire ishq kī naubat baaje

maiñ jahāñ jā.ūñ tire naam se rusvā ho jā.ūñ

aadmī ban ke bahut maiñ ne tujhe sajde kiye

to ḳhudā ban ke mujhe mil maiñ farishta ho jā.ūñ

is tarah mil ki bichhaḌne kā tasavvur na rahe

is tarah maañg mujhe tū ki maiñ terā ho jā.ūñ

itnā bīmār ki sāñsoñ se dhuāñ uThtā hai

aa tujhe dekh luuñ aur dekh ke achchhā ho jā.ūñ

apni hasti ko miTa dun tere jaisa ho jaun

is tarah chahun tujhe main tera hissa ho jaun

paelen bandh ke barish ki karun raqs-e-junun

tu ghaTa ban ke baras aur main sahra ho jaun

dur tak Thahra hua jhil ka pani hun main

teri parchhain jo paD jae to dariya ho jaun

shahr-dar-shahr mere ishq ki naubat baje

main jahan jaun tere nam se ruswa ho jaun

aadmi ban ke bahut main ne tujhe sajde kiye

to KHuda ban ke mujhe mil main farishta ho jaun

is tarah mil ki bichhaDne ka tasawwur na rahe

is tarah mang mujhe tu ki main tera ho jaun

itna bimar ki sanson se dhuan uThta hai

aa tujhe dekh lun aur dekh ke achchha ho jaun