apni hasti miTa ke kya hoga

apnī hastī miTā ke kyā hogā

us ko apnā banā ke kyā hogā

jin ke chehre pe haiñ ka.ī chehre

un ko shīsha dikhā ke kyā hogā

apne haq ke liye laḌo khul kar

yuuñ hī aañsū bahā ke kyā hogā

jab haiñ pardes meñ sajan to phir

haath mehñdī rachā ke kyā hogā

be-vafāoñ ko hāl-e-dil apnā

chhoḌiye bhī sunā ke kyā hogā

un ko ḳhud par bhī jab yaqīn nahīñ

merā sar bhī kaTā ke kyā hogā

jo kabhī ham ko pūchhtā hī nahīñ

us kī mahfil meñ jā ke kyā hogā

khiḌkiyāñ zehn kī nahīñ kholīñ

sirf sham.eñ jalā ke kyā hogā

apne a.amāl par nazar rakhiye

aib un ke ginā ke kyā hogā

tū jo duniyā meñ ban rahā hai ḳhudā

sāmne phir ḳhudā ke kyā hogā

ye ḳhabar aa.ī tum na aaoge

phir to ye ghar sajā ke kyā hogā

zikr se jin ke dhaḌkaneñ baḌh jaa.eñ

un se nazreñ milā ke kyā hogā

jab tire pyaar pe yaqīñ hai hameñ

phir hameñ aazmā ke kyā hogā

zindagī meñ agar sukūn na ho

phir ye daulat kamā ke kyā hogā

jo haiñ baune raheñge baune hī

un ko sar par biThā ke kyā hogā

apni hasti miTa ke kya hoga

us ko apna bana ke kya hoga

jin ke chehre pe hain kai chehre

un ko shisha dikha ke kya hoga

apne haq ke liye laDo khul kar

yun hi aansu baha ke kya hoga

jab hain pardes mein sajan to phir

hath mehndi racha ke kya hoga

be-wafaon ko haal-e-dil apna

chhoDiye bhi suna ke kya hoga

un ko KHud par bhi jab yaqin nahin

mera sar bhi kaTa ke kya hoga

jo kabhi hum ko puchhta hi nahin

us ki mahfil mein ja ke kya hoga

khiDkiyan zehn ki nahin kholin

sirf shamen jala ke kya hoga

apne aamal par nazar rakhiye

aib un ke gina ke kya hoga

tu jo duniya mein ban raha hai KHuda

samne phir KHuda ke kya hoga

ye KHabar aai tum na aaoge

phir to ye ghar saja ke kya hoga

zikr se jin ke dhaDkanen baDh jaen

un se nazren mila ke kya hoga

jab tere pyar pe yaqin hai hamein

phir hamein aazma ke kya hoga

zindagi mein agar sukun na ho

phir ye daulat kama ke kya hoga

jo hain baune rahenge baune hi

un ko sar par biTha ke kya hoga