apni hurmat ka wahin aks-e-asar rakhte hain

apnī hurmat kā vahīñ aks-e-asar rakhte haiñ

hai.at-e-sajda meñ jis daar pe sar rakhte haiñ

garche dahlīz pe chhā.ī hai siyāhī shab kī

bām-e-ummīd pe ik shauq-e-sahar rakhte haiñ

zauq-e-āshufta-navā.ī ke havāle kar deñ

ham hayātī ke jo do-chār pahar rakhte haiñ

zer-e-aflāk sahī bām-e-jabīñ se pahle

kitne gardūñ se varā saarī ḳhabar rakhte haiñ

ye hai tamsīl kā pairāya vagarna aaqā

qāb-e-qausain se aage kā safar rakhte haiñ

un ke saa.e kī kasāfat meñ kamī kyūñkar ho

mere aiboñ pe jo har gaam nazar rakhte haiñ

kuchh qalam-zād havāloñ kā tasalsul bāñdhe

vahm-e-nā-puḳhta ko meyār-e-hunar rakhte haiñ

kāḳh-e-sad-rang ke imkāñ meñ baserā na sahī

ham bhī ik aas kā TuuTā huā ghar rakhte haiñ

bām-e-tazvīr se laTkī huī dastāroñ meñ

log dikhlāne ko kyā la.al-o-gohar rakhte haiñ

ḳhud-farārī kī suhūlat to rahegī 'dā.em'

apnī zambīl meñ do-chār safar rakhte haiñ

apni hurmat ka wahin aks-e-asar rakhte hain

haiat-e-sajda mein jis dar pe sar rakhte hain

garche dahliz pe chhai hai siyahi shab ki

baam-e-ummid pe ek shauq-e-sahar rakhte hain

zauq-e-ashufta-nawai ke hawale kar den

hum hayati ke jo do-chaar pahar rakhte hain

zer-e-aflak sahi baam-e-jabin se pahle

kitne gardun se wara sari KHabar rakhte hain

ye hai tamsil ka pairaya wagarna aaqa

qab-e-qausain se aage ka safar rakhte hain

un ke sae ki kasafat mein kami kyunkar ho

mere aibon pe jo har gam nazar rakhte hain

kuchh qalam-zad hawalon ka tasalsul bandhe

wahm-e-na-puKHta ko meyar-e-hunar rakhte hain

kaKH-e-sad-rang ke imkan mein basera na sahi

hum bhi ek aas ka TuTa hua ghar rakhte hain

baam-e-tazwir se laTki hui dastaron mein

log dikhlane ko kya lal-o-gohar rakhte hain

KHud-farari ki suhulat to rahegi 'daem'

apni zambil mein do-chaar safar rakhte hain