apni jaanib tere dil ke sabhi gham khinchte hain

apnī jānib tire dil ke sabhī ġham khīñchte haiñ

tere apne to baḌhā dete haiñ ham khīñchte haiñ

haa.e ai zindagī ab terī masāfat ke azaab

baiTh jaate haiñ kisī saa.e meñ dam khīñchte haiñ

vahshat-e-zulmat-o-tanhā.ī ke lashkar haiñ udhar

jis taraf mujh ko tire rahm-o-karam khīñchte haiñ

safha-e-hastī-e-fānī pe ba-har-sūrat-e-shauq

jo lakīreñ nazar aatī haiñ vo ham khīñchte haiñ

mai se tauba bhī hai lāzim tirī taqlīd bhī farz

kyā karūñ ab jo tire naqsh-e-qadam khīñchte haiñ

ham junūñ-zād haiñ jazbāt ke qaa.il 'āfāq'

kab tire hijr meñ zanjīr-e-alam khīñchte haiñ

apni jaanib tere dil ke sabhi gham khinchte hain

tere apne to baDha dete hain hum khinchte hain

hae ai zindagi ab teri masafat ke azab

baiTh jate hain kisi sae mein dam khinchte hain

wahshat-e-zulmat-o-tanhai ke lashkar hain udhar

jis taraf mujh ko tere rahm-o-karam khinchte hain

safha-e-hasti-e-fani pe ba-har-surat-e-shauq

jo lakiren nazar aati hain wo hum khinchte hain

mai se tauba bhi hai lazim teri taqlid bhi farz

kya karun ab jo tere naqsh-e-qadam khinchte hain

hum junun-zad hain jazbaat ke qail 'afaq'

kab tere hijr mein zanjir-e-alam khinchte hain