apni khoi hui jannaten pa gae zist ke raste bhulte bhulte

apnī khoī huī jannateñ pā ga.e ziist ke rāste bhūlte bhūlte

maut kī vādiyoñ meñ kahīñ kho ga.e terī āvāz ko DhūñDte DhūñDte

mast-o-sarshār the koī Thokar lagī āsmāñ se zamīñ par yuuñ ham aa ga.e

shāḳh se phuul jaise koī gir paḌe raqs-e-āvāz par jhūmte jhūmte

koī patthar nahīñ huuñ ki jis shakl meñ mujh ko chāho banāyā bigāḌā karo

bhuul jaane kī koshish to kī thī magar yaad tum aa ga.e bhūlte bhūlte

āñkheñ āñsū-bharī palkeñ bojhal ghanī jaise jhīleñ bhī hoñ narm saa.e bhī hoñ

vo to kahiye unheñ kuchh hañsī aa ga.ī bach ga.e aaj ham Dūbte Dūbte

ab vo gesū nahīñ haiñ jo saaya kareñ ab vo shāne nahīñ jo sahārā baneñ

maut ke bāzuo tum hī aage baḌho thak ga.e aaj ham ghūmte ghūmte

dil meñ jo tiir haiñ apne hī tiir haiñ apnī zanjīr se pā-ba-zanjīr haiñ

sang-rezo ko ham ne ḳhudā kar diyā āḳhirash raat din pūjte pūjte

apni khoi hui jannaten pa gae zist ke raste bhulte bhulte

maut ki wadiyon mein kahin kho gae teri aawaz ko DhunDte DhunDte

mast-o-sarshaar the koi Thokar lagi aasman se zamin par yun hum aa gae

shaKH se phul jaise koi gir paDe raqs-e-awaz par jhumte jhumte

koi patthar nahin hun ki jis shakl mein mujh ko chaho banaya bigaDa karo

bhul jaane ki koshish to ki thi magar yaad tum aa gae bhulte bhulte

aankhen aansu-bhari palken bojhal ghani jaise jhilen bhi hon narm sae bhi hon

wo to kahiye unhen kuchh hansi aa gai bach gae aaj hum Dubte Dubte

ab wo gesu nahin hain jo saya karen ab wo shane nahin jo sahaara banen

maut ke bazuo tum hi aage baDho thak gae aaj hum ghumte ghumte

dil mein jo tir hain apne hi tir hain apni zanjir se pa-ba-zanjir hain

sang-rezo ko hum ne KHuda kar diya aaKHirash raat din pujte pujte