apni KHush-zauqi pe ek ilzam ho kar rah gae

apnī ḳhush-zauqī pe ik ilzām ho kar rah ga.e

naam vaale the barā.e-nām ho kar rah ga.e

ā.inoñ meñ koī vāzeh aks kyoñ aane lagā

jab hamīñ min-jumla-e-auhām ho kar rah ga.e

kitne saa.e zindagī kī ik alāmat ban ga.e

kitne jazbe zehn kā ib.hām ho kar rah ga.e

ham bhī kyā kahte kisī se log kyā pahchānte

tere ghar kī sub.h the aur shaam ho kar rah ga.e

raah meñ TuuTe hue par uḌne vāloñ ke liye

kaise kaise halqa-hā-e-dām ho kar rah ga.e

umr bhar parchhā.iyāñ apne ta.āqub meñ rahīñ

jab haqā.eq se bache badnām ho kar rah ga.e

un ke dāman se zarā sā fāsla kyā baḌh gayā

ham rahīn-e-gardish-e-ayyām ho kar rah ga.e

apni KHush-zauqi pe ek ilzam ho kar rah gae

nam wale the barae-nam ho kar rah gae

aainon mein koi wazeh aks kyon aane laga

jab hamin min-jumla-e-auham ho kar rah gae

kitne sae zindagi ki ek alamat ban gae

kitne jazbe zehn ka ibham ho kar rah gae

hum bhi kya kahte kisi se log kya pahchante

tere ghar ki subh the aur sham ho kar rah gae

rah mein TuTe hue par uDne walon ke liye

kaise kaise halqa-ha-e-dam ho kar rah gae

umr bhar parchhaiyan apne taaqub mein rahin

jab haqaeq se bache badnam ho kar rah gae

un ke daman se zara sa fasla kya baDh gaya

hum rahin-e-gardish-e-ayyam ho kar rah gae