اپنی لے میں گانا مشکل

اپنی لے میں گانا مشکل

دل کو یہ سمجھانا مشکل

دھوپ جڑوں تک کیسے آئے

پتوں پر لہرانا مشکل

میری اک تصویر ٹنگی ہے

پار سمندر جانا مشکل

چڑھتی سانسیں ڈوبتا دریا

لہروں کا لہرانا مشکل

برگ و شجر سب خون سے لت پت

منظر یہ جھٹلانا مشکل

سامنے اپنے میں بھی کھڑا ہوں

مجھ کو گھیر کے لانا مشکل

چال ہے گہری ورنہ دل کو

ایسے بھول کے جانا مشکل

رات کا ہے وہ جاگنے والا

صبح سویرے آنا مشکل

ماہر ہے وہ حرف و صدا کا

باتوں میں الجھانا مشکل

تم سے بچھڑ کر کیا کچھ بیتی

یہ سب ہے دہرانا مشکل

اس کی گلی کا حال نہ پوچھو

اب تو آنا جانا مشکل

موجوں کی دیوار کھڑی ہے

بیچ بھنور میں جانا مشکل

اس کی کہانی کس سے کہیے

اجملؔ کا افسانہ مشکل