apni nazren dar-o-diwar par aksar rakhna

apnī nazreñ dar-o-dīvār par aksar rakhnā

ajnabī ghar meñ qadam soch-samajh kar rakhnā

kahīñ phaT jaa.e kaleja na vufūr-e-ġham se

apnī palkoñ meñ chhupā kar na samundar rakhnā

itnā āsān nahīñ un ko bhulānā dil se

soch kar apne kaleje pe ye patthar rakhnā

yaad aatā hai vo manzar tire afsāne kā

apne mahbūb ko dushman ke barābar rakhnā

ḳhvāb meñ ā.eñge pur-nūr parinde lekin

shart hai saaf magar zehn kā bistar rakhnā

sauñp dī maiñ ne tumheñ mehr-o-vafā kī kunjī

lauT ā.ūñgā salīqe se mirā ghar rakhnā

ai 'asar' abrū phūloñ kī jhulas jā.egī

tum na sho'loñ kī hathelī pe gul-e-tar rakhnā

apni nazren dar-o-diwar par aksar rakhna

ajnabi ghar mein qadam soch-samajh kar rakhna

kahin phaT jae kaleja na wufur-e-gham se

apni palkon mein chhupa kar na samundar rakhna

itna aasan nahin un ko bhulana dil se

soch kar apne kaleje pe ye patthar rakhna

yaad aata hai wo manzar tere afsane ka

apne mahbub ko dushman ke barabar rakhna

KHwab mein aaenge pur-nur parinde lekin

shart hai saf magar zehn ka bistar rakhna

saunp di main ne tumhein mehr-o-wafa ki kunji

lauT aaunga saliqe se mera ghar rakhna

ai 'asar' abru phulon ki jhulas jaegi

tum na sho'lon ki hatheli pe gul-e-tar rakhna