apni qismat ke hue sare sitare patthar

apnī qismat ke hue saare sitāre patthar

phuul dāman meñ tire aur hamāre patthar

ham bhī 'iisā kī tarah tum se yahī kahte haiñ

jo gunahgār nahīñ hai vahī maare patthar

haq na mil paa.e mashaqqat kā to hotā hai yahī

zulm ke sāmne hote haiñ sahāre patthar

mo'jiza 'ishq kā ye bhī hai zamāne vaalo

mere āñgan meñ hue phuul tumhāre patthar

dast-e-nafrat ne kiyā paikar-e-īmāñ zaḳhmī

muft meñ ho ga.e badnām bechāre patthar

sone chāñdī ne to kuchh bhī na diyā ham ko 'zafar'

yā-ḳhudā ab mirī qismat ko sañvāre patthar

apni qismat ke hue sare sitare patthar

phul daman mein tere aur hamare patthar

hum bhi 'isa ki tarah tum se yahi kahte hain

jo gunahgar nahin hai wahi mare patthar

haq na mil pae mashaqqat ka to hota hai yahi

zulm ke samne hote hain sahaare patthar

mo'jiza 'ishq ka ye bhi hai zamane walo

mere aangan mein hue phul tumhaare patthar

dast-e-nafrat ne kiya paikar-e-iman zaKHmi

muft mein ho gae badnam bechaare patthar

sone chandi ne to kuchh bhi na diya hum ko 'zafar'

ya-KHuda ab meri qismat ko sanware patthar