apni qismat mein agar aish ke saman hote

apnī qismat meñ agar aish ke sāmāñ hote

ain mumkin thā ki ham aur pareshāñ hote

bāġhbāñ naaz na kar apne chaman-zāroñ par

ham ne dekhe haiñ chaman-zār bayābāñ hote

aur hī Dhañg se tanzīm-e-gulistāñ hotī

dūr-andesh agar ahl-e-gulistāñ hote

yahī duniyā jo jahannum hai vo jannat hotī

apne kirdār se insāñ agar insāñ hote

shāḳh-e-nāzuk pe khule hī the ki murjhā bhī ga.e

ek din phuul yahī shān-e-bahārāñ hote

apne hī ghar kī kisī shai pe nahīñ haq apnā

is se behtar thā ki ham be-sar-o-sāmāñ hote

ham ne har jaur sahā un kā ḳhushī se lekin

kaash vo apnī jafāoñ pe pashemāñ hote

koī ḳhūbī na koī vasf na koī jauhar

ham agar hote to kis baat pe nāzāñ hote

tab.a mauzūñ meñ agar zor-e-bayāñ bhī hotā

ham bhī auroñ kī tarah sho.ala-ba-dāmāñ hote

ai 'kañval' pā-e-talab hī meñ thī laġhzish varna

marhale jo bhī the is raah meñ āsāñ hote

apni qismat mein agar aish ke saman hote

ain mumkin tha ki hum aur pareshan hote

baghban naz na kar apne chaman-zaron par

hum ne dekhe hain chaman-zar bayaban hote

aur hi Dhang se tanzim-e-gulistan hoti

dur-andesh agar ahl-e-gulistan hote

yahi duniya jo jahannum hai wo jannat hoti

apne kirdar se insan agar insan hote

shaKH-e-nazuk pe khule hi the ki murjha bhi gae

ek din phul yahi shan-e-bahaaran hote

apne hi ghar ki kisi shai pe nahin haq apna

is se behtar tha ki hum be-sar-o-saman hote

hum ne har jaur saha un ka KHushi se lekin

kash wo apni jafaon pe pasheman hote

koi KHubi na koi wasf na koi jauhar

hum agar hote to kis baat pe nazan hote

taba mauzun mein agar zor-e-bayan bhi hota

hum bhi auron ki tarah shoala-ba-daman hote

ai 'kanwal' pa-e-talab hi mein thi laghzish warna

marhale jo bhi the is rah mein aasan hote