اپنی قدرت سے خدا حسن بیانی دے دے

اپنی قدرت سے خدا حسن بیانی دے دے

کتنا مہمل ہوں مجھے لفظ و معانی دے دے

زندگی دیتا ہے جو اس پہ یقیں ہے میرا

دے سکے موت تو اے دشمن جانی دے دے

تو مرے پیار میں ڈھل جائے گا رفتہ رفتہ

اپنے برتاؤ سے یہ حسن گمانی دے دے

جس میں ہر چیز کی دریافت کا رہتا تھا جنوں

پھر مجھے مولا وہی عمر دوانی دے دے

زندگی بھر جسے سینے سے لگا کر رکھوں

وقت رخصت ہے تو اک ایسی نشانی دے دے

پھر تو ہر دل پہ حکومت ہو تری اے بھائی

اپنے لہجے کو اگر چرب زبانی دے دے

میرا بھی پیار ہو ہم دوش بہاراں جاناں

تو اگر ہونٹوں کو اقرار بیانی دے دے

کتنے ہی کرب سے گزرا ہوں تو یہ شعر ہوا

اس کو تشہیر بھی اب شاہجہانی دے دے