apni tabi’aton mein na ghussa na taw tha

apnī tabī’atoñ meñ na ġhussa na taav thā

be-iltifātiyoñ ke sabab ye subhāv thā

ā'sāb meñ tanāv diloñ meñ khiñchāv thā

mauzū'-e-guftugū yahī bāzār bhaav thā

apnā vajūd bhī koī kāġhaz kī naav thā

bahtā chalā gayā hai jahāñ tak bahāv thā

saada the aise ham ki samajh hī nahīñ sake

bātoñ meñ kaisā pher thā kaisā ghumāv thā

galiyāñ vahīñ haiñ shahr vahī rāste vahī

vo log hī nahīñ rahe jin se lagāv thā

apne liye sune hue qissoñ meñ thā maza

ahbāb ke ḳhulūs meñ aisā dabāv thā

dushman bhī dushmanoñ kī tarah mil nahīñ sakā

apne mizāj meñ bhī baḌā rakh-rakhāv thā

majbūr yuuñ hue ki hameñ yaad hī nahīñ

mailān kis taraf thā kidhar ko jhukāv thā

tārīḳh likhne vāloñ se 'iqbāl' pūchhiye

apne vatan meñ pahle bhī kyā bhed-bhāv thā

apni tabi’aton mein na ghussa na taw tha

be-iltifatiyon ke sabab ye subhaw tha

aa'sab mein tanaw dilon mein khinchaw tha

mauzu'-e-guftugu yahi bazar bhaw tha

apna wajud bhi koi kaghaz ki naw tha

bahta chala gaya hai jahan tak bahaw tha

sada the aise hum ki samajh hi nahin sake

baaton mein kaisa pher tha kaisa ghumaw tha

galiyan wahin hain shahr wahi raste wahi

wo log hi nahin rahe jin se lagaw tha

apne liye sune hue qisson mein tha maza

ahbab ke KHulus mein aisa dabaw tha

dushman bhi dushmanon ki tarah mil nahin saka

apne mizaj mein bhi baDa rakh-rakhaw tha

majbur yun hue ki hamein yaad hi nahin

mailan kis taraf tha kidhar ko jhukaw tha

tariKH likhne walon se 'iqbaal' puchhiye

apne watan mein pahle bhi kya bhed-bhaw tha