apni talab ka nam Dubone kyun jaen mai-KHane tak

apnī talab kā naam Dubone kyuuñ jaa.eñ mai-ḳhāne tak

tishna-labī kā ik dariyā hai shīshe se paimāne tak

husn o 'ishq kā soz-e-ta.alluq samtoñ kā pāband nahīñ

aksar to ḳhud sham' kā sho'la baḌh ke gayā parvāne tak

rāh-e-talab ke pech-o-ḳham kā andāza āsān nahīñ

ahl-e-ḳhirad kyā chiiz haiñ rasta bhuul ga.e dīvāne tak

saaqī ko ye ḳhush-fahmī thī ham tak mauj na aa.egī

pyaas kā jab paimāna chhalkā Duub ga.e mai-ḳhāne tak

miTTī se jab phuul khilā.e kār-e-junūñ kī mehnat ne

shahr kuchh is andāz se phaile jā pahuñche vīrāne tak

zaḳhm-e-hunar kā rañg salāmat sab ko ḳhabar ho jā.egī

kitne chehre ham ne tarāshe haath qalam ho jaane tak

is ġhurbat kī dhuup meñ 'shā.ir' apnoñ kā saaya bhī na thā

jis ġhurbat kī dhuup meñ ham ko yaad aa.e begāne tak

apni talab ka nam Dubone kyun jaen mai-KHane tak

tishna-labi ka ek dariya hai shishe se paimane tak

husn o 'ishq ka soz-e-talluq samton ka paband nahin

aksar to KHud sham' ka sho'la baDh ke gaya parwane tak

rah-e-talab ke pech-o-KHam ka andaza aasan nahin

ahl-e-KHirad kya chiz hain rasta bhul gae diwane tak

saqi ko ye KHush-fahmi thi hum tak mauj na aaegi

pyas ka jab paimana chhalka Dub gae mai-KHane tak

miTTi se jab phul khilae kar-e-junun ki mehnat ne

shahr kuchh is andaz se phaile ja pahunche virane tak

zaKHm-e-hunar ka rang salamat sab ko KHabar ho jaegi

kitne chehre hum ne tarashe hath qalam ho jaane tak

is ghurbat ki dhup mein 'shair' apnon ka saya bhi na tha

jis ghurbat ki dhup mein hum ko yaad aae begane tak