apni tanhai ke sailab mein bahte rahna

apnī tanhā.ī ke sailāb meñ bahte rahnā

kitnā dushvār hai ai dost akele rahnā

paañv patthar kiye dete haiñ ye mīloñ ke safar

aur manzil kā taqāza hai ki chalte rahnā

band kamre meñ kisī yaad kī ḳhushbū oḌhe

tum bhī 'ġhālib' kī tarah yaad meñ Duube rahnā

bahte rahne se to dariyāoñ meñ kho jāoge

jhiil banñā hai to ik moḌ pe Thahre rahnā

dar-o-dīvār jahāñ jaan ke dushman ho jaa.eñ

aur usī ghar meñ jo rahnā ho to kaise rahnā

dushmanoñ se to kabhī ḳhauf na khānā lekin

mashvara ye hai ki ahbāb se bach ke rahnā

jaane kyā rog lagā rakkhā hai tum ne 'tāriq'

har jagah TuuTe hue bikhre hue se rahnā

apni tanhai ke sailab mein bahte rahna

kitna dushwar hai ai dost akele rahna

panw patthar kiye dete hain ye milon ke safar

aur manzil ka taqaza hai ki chalte rahna

band kamre mein kisi yaad ki KHushbu oDhe

tum bhi 'ghaalib' ki tarah yaad mein Dube rahna

bahte rahne se to dariyaon mein kho jaoge

jhil banna hai to ek moD pe Thahre rahna

dar-o-diwar jahan jaan ke dushman ho jaen

aur usi ghar mein jo rahna ho to kaise rahna

dushmanon se to kabhi KHauf na khana lekin

mashwara ye hai ki ahbab se bach ke rahna

jaane kya rog laga rakkha hai tum ne 'tariq'

har jagah TuTe hue bikhre hue se rahna