apni taqdir ka shikwa nahin likhkha maine

apnī taqdīr kā shikva nahīñ likhkhā maiñ ne

ḳhud ko mahrūm-e-tamannā nahīñ likhkhā maiñ ne

ai qalam karnā mire haath kī laġhzish ko muaaf

tujh se shāhoñ kā qasīda nahīñ likhkhā maiñ ne

gir na jaa.e tire meyār se andāz-e-hurūf

yuuñ kabhī naam bhī terā nahīñ likhkhā maiñ ne

huuñ isī jurm kī pādāsh meñ pyāsā shāyad

tapte sahrāoñ ko dariyā nahīñ likhkhā maiñ ne

aaj kā ḳhat hī use bhejā hai korā lekin

aaj kā ḳhat hī adhūrā nahīñ likhkhā maiñ ne

jo na pahchān sakā vaqt kī nabzeñ 'hāmid'

us masīhā ko masīhā nahīñ likhkhā maiñ ne

apni taqdir ka shikwa nahin likhkha main ne

KHud ko mahrum-e-tamanna nahin likhkha main ne

ai qalam karna mere hath ki laghzish ko muaf

tujh se shahon ka qasida nahin likhkha main ne

gir na jae tere meyar se andaz-e-huruf

yun kabhi nam bhi tera nahin likhkha main ne

hun isi jurm ki padash mein pyasa shayad

tapte sahraon ko dariya nahin likhkha main ne

aaj ka KHat hi use bheja hai kora lekin

aaj ka KHat hi adhura nahin likhkha main ne

jo na pahchan saka waqt ki nabzen 'hamid'

us masiha ko masiha nahin likhkha main ne