apni taqdir ko piTe jo pareshan hai koi

apnī taqdīr ko piiTe jo pareshāñ hai koī

aap ke bas meñ ilāj-e-ġham-e-daurāñ hai koī

rokiye us ko jo is vaqt ġhazal-ḳhvāñ hai koī

jail meñ naġhma-sarā.ī kā bhī imkāñ hai koī

apnī marzī se to ugte nahīñ ḳhud-rav paude

ham ġharīboñ kā ba-har-hāl nigahbāñ hai koī

zard chehroñ ko tabassum ne kiyā hai rusvā

varna zāhir bhī na hotā ki pareshāñ hai koī

hirs darbān ko aaqā kā musāhib samjhe

sabr aaqā ko samajhtā hai ki darbāñ hai koī

chaap sun kar jo haTā dī thī uThā lā saaqī

shaiḳh sāhab haiñ maiñ samjhā thā musalmāñ hai koī

mujh se kāfir ke yahāñ 'shād' mukammal sarqa

asas-e-shahr baḌā sāhab-e-īmāñ hai koī

apni taqdir ko piTe jo pareshan hai koi

aap ke bas mein ilaj-e-gham-e-dauran hai koi

rokiye us ko jo is waqt ghazal-KHwan hai koi

jail mein naghma-sarai ka bhi imkan hai koi

apni marzi se to ugte nahin KHud-raw paude

hum gharibon ka ba-har-haal nigahban hai koi

zard chehron ko tabassum ne kiya hai ruswa

warna zahir bhi na hota ki pareshan hai koi

hirs darban ko aaqa ka musahib samjhe

sabr aaqa ko samajhta hai ki darban hai koi

chap sun kar jo haTa di thi uTha la saqi

shaiKH sahab hain main samjha tha musalman hai koi

mujh se kafir ke yahan 'shad' mukammal sarqa

asas-e-shahr baDa sahab-e-iman hai koi