apni to guzri hai aksar apni hi man-mani mein

apnī to guzrī hai aksar apnī hī man-mānī meñ

lekin achchhe kaam bhī ham ne kar Daale nādānī meñ

ham Thahre āvāra panchhī sair gagan kī karte haiñ

jaan ke ham ko kyā karnā hai kaun hai kitne paanī meñ

ruuh ko us kī raah kā patthar banñā hī manzūr na thā

baazī ham ne hī jiitī hai apnī is qurbānī meñ

yaar na.ī kuchh baat agar ho ham bhī sajda kar leñge

aksar ek hī baat sunī hai sab santoñ kī baanī meñ

mehnat kar ke ham to āḳhir bhūke bhī so jā.eñge

yā maulā tū barkat rakhnā bachchoñ kī guḌ-dhānī meñ

mauqe to ham tak bhī aa.e ḳhuub kamā khā lete ham

lekin ek zamīr thā bhītar allāh kī nigrānī meñ

apni to guzri hai aksar apni hi man-mani mein

lekin achchhe kaam bhi hum ne kar Dale nadani mein

hum Thahre aawara panchhi sair gagan ki karte hain

jaan ke hum ko kya karna hai kaun hai kitne pani mein

ruh ko us ki rah ka patthar banna hi manzur na tha

bazi hum ne hi jiti hai apni is qurbani mein

yar nai kuchh baat agar ho hum bhi sajda kar lenge

aksar ek hi baat suni hai sab santon ki bani mein

mehnat kar ke hum to aaKHir bhuke bhi so jaenge

ya maula tu barkat rakhna bachchon ki guD-dhani mein

mauqe to hum tak bhi aae KHub kama kha lete hum

lekin ek zamir tha bhitar allah ki nigrani mein