apni to taqdir mein shab-bhar KHak uDana hoga hi

apnī to taqdīr meñ shab-bhar ḳhaak uḌānā hogā hī

yaar to saare bichhaḌ chale haiñ un kā Thikānā hogā hī

din chaḌh aayā kyoñ nahīñ aa.e jaa.eñ un se pūchh aa.eñ

lekin un ke paas to ai dil koī bahāna hogā hī

aao chaleñ un kī mahfil meñ aur apnī sudh-budh kho deñ

aaj bhī yaaro un āñkhoñ meñ koī fasāna hogā hī

sub.h ko shab kah dete haiñ ham sach ko jhuuT batāte haiñ

ham jaise sar-phiroñ se to nārāz zamāna hogā hī

ai rangūn meñ chaltī havā merā sandesa letī jā

terā to un kī galiyoñ meñ ānā-jānā hogā hī

aaj milā thā 'pāshī' se maiñ vo bhī hai shādāb bahut

mirī tarah us ke dil meñ bhī ġham kā ḳhazāna hogā hī

apni to taqdir mein shab-bhar KHak uDana hoga hi

yar to sare bichhaD chale hain un ka Thikana hoga hi

din chaDh aaya kyon nahin aae jaen un se puchh aaen

lekin un ke pas to ai dil koi bahana hoga hi

aao chalen un ki mahfil mein aur apni sudh-budh kho den

aaj bhi yaro un aankhon mein koi fasana hoga hi

subh ko shab kah dete hain hum sach ko jhuT batate hain

hum jaise sar-phiron se to naraaz zamana hoga hi

ai rangun mein chalti hawa mera sandesa leti ja

tera to un ki galiyon mein aana-jaana hoga hi

aaj mila tha 'pashi' se main wo bhi hai shadab bahut

meri tarah us ke dil mein bhi gham ka KHazana hoga hi