apni yahi pahchan, yahi apna pata hai

apnī yahī pahchān, yahī apnā patā hai

ik umr se ye sar kisī chaukhaT pe jhukā hai

yuuñ sehr-e-taḳhātub hai har ik samt ki fil-asr

khultā hī nahīñ kaun yahāñ kis kā ḳhudā hai

darvāza nahīñ, biich meñ dīvār hai apne

aur dastak-e-dīvār se dar kam hī khulā hai

jab jab dil-e-nāzuk pe paḌī choT koī bhī

kuchh din to dhuāñ dil se har ik lamha uThā hai

is TūTtī bantī huī duniyā meñ abhī tak

kitnoñ kā sahārā to faqat nām-e-ḳhudā hai

mahsūs kareñ sab hī bayāñ ho na kisī se

us saada o ma.asūm meñ kuchh aisī adā hai

phal jis pe na the, saaya magar sab ke liye thā

chhitnār shajar ab ke vo āñdhī meñ girā hai

kyā aur bhī darkār hai kuchh is ke sivā bhī

ai shauq-e-talab tere liye vaqt rukā hai

parvāzī-e-aflāk-e-ḳhirad jab huī aajiz

tab dahr-parastoñ ne bhī samjhā ki ḳhudā hai

ye mehr-o-muravvat to bajā, phir bhī mire dost

zālim pe karam zulm se iz.hār-e-vafā hai

ab ālam-e-fānī kī na.ī sharheñ bhī samjho

jo koī na paḌh paayā thā vo tum ne paḌhā hai

ye sabza-o-gul, chāñd sitāre, ye zamāna

mil jaa.e ye sab bhii, to haqīqat meñ ye kyā hai

apni yahi pahchan, yahi apna pata hai

ek umr se ye sar kisi chaukhaT pe jhuka hai

yun sehr-e-taKHatub hai har ek samt ki fil-asr

khulta hi nahin kaun yahan kis ka KHuda hai

darwaza nahin, bich mein diwar hai apne

aur dastak-e-diwar se dar kam hi khula hai

jab jab dil-e-nazuk pe paDi choT koi bhi

kuchh din to dhuan dil se har ek lamha uTha hai

is TuTti banti hui duniya mein abhi tak

kitnon ka sahaara to faqat nam-e-KHuda hai

mahsus karen sab hi bayan ho na kisi se

us sada o masum mein kuchh aisi ada hai

phal jis pe na the, saya magar sab ke liye tha

chhitnar shajar ab ke wo aandhi mein gira hai

kya aur bhi darkar hai kuchh is ke siwa bhi

ai shauq-e-talab tere liye waqt ruka hai

parwazi-e-aflak-e-KHirad jab hui aajiz

tab dahr-paraston ne bhi samjha ki KHuda hai

ye mehr-o-murawwat to baja, phir bhi mere dost

zalim pe karam zulm se izhaar-e-wafa hai

ab aalam-e-fani ki nai sharhen bhi samjho

jo koi na paDh paya tha wo tum ne paDha hai

ye sabza-o-gul, chand sitare, ye zamana

mil jae ye sab bhi, to haqiqat mein ye kya hai