apnon ke karam se gar tu dur raha hota

apnoñ ke karam se gar tū duur rahā hotā

ehsān ke sho'loñ se dāman na jalā hotā

dāman mirā duniyā kī daulat se bharā hotā

maiñ ne bhī zamīr apnā gar bech diyā hotā

auqāt hī kyā hotī ham ḳhāk-nashīnoñ kī

rishta tirī yādoñ se gar toḌ diyā hotā

gulshan kī bahāroñ se kuchh to hameñ mil jaatā

ġham is kā na thā dāman kāñToñ se bharā hotā

gar tū mirā ho jaatā duniyā mirī ho jaatī

duniyā na ḳhafā hotī gar tū na ḳhafā hotā

ehsās tumheñ hotā tab merī tabāhī kā

jo vaqt paḌā mujh par tum par bhī paḌā hotā

duniyā se 'na'īm' apnī taqdīr judā hotī

ashkoñ ko mire un kā dāman jo milā hotā

apnon ke karam se gar tu dur raha hota

ehsan ke sho'lon se daman na jala hota

daman mera duniya ki daulat se bhara hota

main ne bhi zamir apna gar bech diya hota

auqat hi kya hoti hum KHak-nashinon ki

rishta teri yaadon se gar toD diya hota

gulshan ki bahaaron se kuchh to hamein mil jata

gham is ka na tha daman kanTon se bhara hota

gar tu mera ho jata duniya meri ho jati

duniya na KHafa hoti gar tu na KHafa hota

ehsas tumhein hota tab meri tabahi ka

jo waqt paDa mujh par tum par bhi paDa hota

duniya se 'na'im' apni taqdir juda hoti

ashkon ko mere un ka daman jo mila hota