apnon se murawwat ka taqaza nahin karte

apnoñ se muravvat kā taqāzā nahīñ karte

sahrāoñ meñ saa.e kī tamannā nahīñ karte

majnūñ pe na kar rashk ki jo ahl-e-vafā haiñ

mar jaate haiñ ma.ashūq ko rusvā nahīñ karte

Tuk dekh liyā āñkhoñ hī āñkhoñ meñ hañse bhī

par yuuñ to ilāj-e-dil-e-shaidā nahīñ karte

kyā ho gayā is shahr ke logoñ ke diloñ ko

ḳhanjar bhī utar jaa.e to dhaḌkā nahīñ karte

bārish kī talab hai to samundar kī taraf jā

ye abr to sahrāoñ pe barsā nahīñ karte

do din kī jo baaqī hai tahammul se basar kar

jo honā hai ho jā.egā sochā nahīñ karte

pachhtāve se baḌh kar koī āzār nahīñ hai

jab dil ko lagāte haiñ to royā nahīñ karte

māyūsī kī ne.amat baḌī mushkil se milī hai

phir aas bañdhāte ho tum achchhā nahīñ karte

jo kuchh kahe 'shohrat' kī ġhazal maan lo us ko

dil ko kabhī shā.er ke dukhāyā nahīñ karte

apnon se murawwat ka taqaza nahin karte

sahraon mein sae ki tamanna nahin karte

majnun pe na kar rashk ki jo ahl-e-wafa hain

mar jate hain mashuq ko ruswa nahin karte

Tuk dekh liya aankhon hi aankhon mein hanse bhi

par yun to ilaj-e-dil-e-shaida nahin karte

kya ho gaya is shahr ke logon ke dilon ko

KHanjar bhi utar jae to dhaDka nahin karte

barish ki talab hai to samundar ki taraf ja

ye abr to sahraon pe barsa nahin karte

do din ki jo baqi hai tahammul se basar kar

jo hona hai ho jaega socha nahin karte

pachhtawe se baDh kar koi aazar nahin hai

jab dil ko lagate hain to roya nahin karte

mayusi ki neamat baDi mushkil se mili hai

phir aas bandhate ho tum achchha nahin karte

jo kuchh kahe 'shohrat' ki ghazal man lo us ko

dil ko kabhi shaer ke dukhaya nahin karte