aqide bujh rahe hain sham-e-jaan gul hoti jati hai

aqīde bujh rahe haiñ sham-e-jāñ gul hotī jaatī hai

magar zauq-e-junūñ kī sho.ala-sāmānī nahīñ jaatī

ḳhudā mālūm kis kis ke lahū kī lāla-kārī hai

zamīn-e-kū-e-jānāñ aaj pahchānī nahīñ jaatī

agar yuuñ hai to kyuuñ hai yuuñ nahīñ to kyuuñ nahīñ āḳhir

yaqīñ mohkam hai lekin dil kī hairānī nahīñ jaatī

lahū jitnā thā saarā sarf-e-maqtal ho gayā lekin

shahīdān-e-vafā ke ruḳh kī tābānī nahīñ jaatī

pareshāñ-rozgār āshufta-hālāñ kā muqaddar hai

ki us zulf-e-pareshāñ kī pareshānī nahīñ jaatī

har ik shai aur mahñgī aur mahñgī hotī jaatī hai

bas ik ḳhūn-e-bashar hai jis kī arzānī nahīñ jaatī

na.e ḳhvāboñ ke dil meñ sho.ala-e-ḳhurshīd-e-mahshar hai

zamīr-e-hazrat-e-insāñ kī sultānī nahīñ jaatī

lagāte haiñ laboñ par mohr-e-arbāb-e-zabāñ-bandī

alī-'sardār' kī shān-e-ġhazal-ḳhvānī nahīñ jaatī

aqide bujh rahe hain sham-e-jaan gul hoti jati hai

magar zauq-e-junun ki shoala-samani nahin jati

KHuda malum kis kis ke lahu ki lala-kari hai

zamin-e-ku-e-jaanan aaj pahchani nahin jati

agar yun hai to kyun hai yun nahin to kyun nahin aaKHir

yaqin mohkam hai lekin dil ki hairani nahin jati

lahu jitna tha sara sarf-e-maqtal ho gaya lekin

shahidan-e-wafa ke ruKH ki tabani nahin jati

pareshan-rozgar aashufta-haalan ka muqaddar hai

ki us zulf-e-pareshan ki pareshani nahin jati

har ek shai aur mahngi aur mahngi hoti jati hai

bas ek KHun-e-bashar hai jis ki arzani nahin jati

nae KHwabon ke dil mein shoala-e-KHurshid-e-mahshar hai

zamir-e-hazrat-e-insan ki sultani nahin jati

lagate hain labon par mohr-e-arbab-e-zaban-bandi

ali-'sardar' ki shan-e-ghazal-KHwani nahin jati