aql gai hai sab ki khoi kya ye KHalq diwani hai

aql ga.ī hai sab kī khoī kyā ye ḳhalq divānī hai

aap halāl maiñ hotā huuñ in logoñ ko qurbānī hai

nutq-e-zabāñ gar hotā mujh ko pūchhtā maiñ taqsīr mirī

haañ ye magar do āñkheñ haiñ so in se ashk-fishānī hai

ghaas charī hai jañgal kī maiñ juun meñ dumbe bakre kī

un kā kuchh Dhālā ki bigāḌā jis par ḳhanjar raanī hai

tiin jagah se mere gale ko misl-e-shutur ye kāTte haiñ

dīn-e-mohammadī hai jo ḳhalīlī us kī ye tuġhyānī hai

jins ne jins ko qatl kiyā kab dekhiyo bad-zātī to zarā

ya.anī jo ho mard-e-musalmāñ us kī ye hī nishānī hai

kāfir dil jallād nahīñ ham zaḳhm ko ek samajhte haiñ

ham ko jo is kaam kā samjhe us kī ye nādānī hai

rāh-e-razā par apnā galā kaTvā.e jo nīche ḳhanjar ke

'mus.hafī' us ko ham ye kaheñge vo bhī husain-e-sānī hai

aql gai hai sab ki khoi kya ye KHalq diwani hai

aap halal main hota hun in logon ko qurbani hai

nutq-e-zaban gar hota mujh ko puchhta main taqsir meri

han ye magar do aankhen hain so in se ashk-fishani hai

ghas chari hai jangal ki main jun mein dumbe bakre ki

un ka kuchh Dhaala ki bigaDa jis par KHanjar rani hai

tin jagah se mere gale ko misl-e-shutur ye kaTte hain

din-e-mohammadi hai jo KHalili us ki ye tughyani hai

jins ne jins ko qatl kiya kab dekhiyo bad-zati to zara

yani jo ho mard-e-musalman us ki ye hi nishani hai

kafir dil jallad nahin hum zaKHm ko ek samajhte hain

hum ko jo is kaam ka samjhe us ki ye nadani hai

rah-e-raza par apna gala kaTwae jo niche KHanjar ke

'mushafi' us ko hum ye kahenge wo bhi husain-e-sani hai