aql jis pahlu se chahe zist samjhae ise

aql jis pahlū se chāhe ziist samjhā.e ise

dil kā ye 'ālam ki har lamhe se ḳhauf aa.e ise

dasht kā raahī bhaTak kar aa gayā hai shahr meñ

qais koī ho to apne saath le jaa.e ise

sar-ba-zānū yaad kā zindānī hai baiThā huā

koī mīThī yaad aa.e aa ke sahlā.e ise

ye hī sab ko dars detā hai qarār-o-sabr kā

ye hī bekal ho uThe to kaun samjhā.e ise

bulbul-e-muztar kī qismat jaag jaa.e ek din

chhū ke gul bād-e-sabā chhū kar guzar jaa.e ise

ajnabī ek shahr meñ hai ajnabī logoñ ke biich

kaun pahchāne ise aur le ke ghar jaa.e ise

tum ko gar bīmār kī hai fikr kuchh aisā karo

ye baḌī taklīf meñ hai niiñd aa jaa.e ise

ai junūñ ab dil kā koī aur maskan DhūñD lo

hai parī-chehra koī jo aa ke le jaa.e ise

aql jis pahlu se chahe zist samjhae ise

dil ka ye 'alam ki har lamhe se KHauf aae ise

dasht ka rahi bhaTak kar aa gaya hai shahr mein

qais koi ho to apne sath le jae ise

sar-ba-zanu yaad ka zindani hai baiTha hua

koi miThi yaad aae aa ke sahlae ise

ye hi sab ko dars deta hai qarar-o-sabr ka

ye hi bekal ho uThe to kaun samjhae ise

bulbul-e-muztar ki qismat jag jae ek din

chhu ke gul baad-e-saba chhu kar guzar jae ise

ajnabi ek shahr mein hai ajnabi logon ke bich

kaun pahchane ise aur le ke ghar jae ise

tum ko gar bimar ki hai fikr kuchh aisa karo

ye baDi taklif mein hai nind aa jae ise

ai junun ab dil ka koi aur maskan DhunD lo

hai pari-chehra koi jo aa ke le jae ise