aql kahti hai koi DhunD mafar ki surat

aql kahtī hai koī DhūñD mafar kī sūrat

dil ye kahtā hai badal jā.egī ghar kī sūrat

kaun raste meñ inheñ chhoḌ ke jā saktā hai

ḳhvāhisheñ hotī haiñ sāmān-e-safar kī sūrat

aadmī taash ke patte haiñ tire hāthoñ meñ

ai ḳhudā tū bhī to hai shobada-gar kī sūrat

merī tar-dāmanī-e-chashm pe yuuñ tanz na kar

maiñ sadaf huuñ tū mirā dil hai guhar kī sūrat

apnī hī zaat kā ik dā.era bun rakkhā hai

apnī gardish meñ haiñ ham log bhañvar kī sūrat

jaane kis samt ye shorīda-sarī le jaa.e

zad meñ āñdhī kī huuñ TuuTe hue par kī sūrat

kaun aayā sar-e-sahrā-e-mohabbat 'mohsin'

zarra zarra mahak uTThā gul-e-tar kī sūrat

aql kahti hai koi DhunD mafar ki surat

dil ye kahta hai badal jaegi ghar ki surat

kaun raste mein inhen chhoD ke ja sakta hai

KHwahishen hoti hain saman-e-safar ki surat

aadmi tash ke patte hain tere hathon mein

ai KHuda tu bhi to hai shobada-gar ki surat

meri tar-damani-e-chashm pe yun tanz na kar

main sadaf hun tu mera dil hai guhar ki surat

apni hi zat ka ek daera bun rakkha hai

apni gardish mein hain hum log bhanwar ki surat

jaane kis samt ye shorida-sari le jae

zad mein aandhi ki hun TuTe hue par ki surat

kaun aaya sar-e-sahra-e-mohabbat 'mohsin'

zarra zarra mahak uTTha gul-e-tar ki surat