aql ki sath se kuchh aur ubhar jaana tha

'aql kī sat.h se kuchh aur ubhar jaanā thā

'ishq ko manzil-e-pastī se guzar jaanā thā

jalve the halqa-e-sar dām-e-nazar se bāhar

maiñ ne har jalve ko pāband-e-nazar jaanā thā

husn kā ġham bhī hasīñ fikr hasīñ dard hasīñ

un ko har rang meñ har taur sañvar jaanā thā

husn ne shauq ke hañgāme to dekhe the bahut

'ishq ke dāva-e-taqdīs se Dar jaanā thā

ye to kyā kahiye chalā thā maiñ kahāñ se hamdam

mujh ko ye bhī na thā mā'lūm kidhar jaanā thā

husn aur 'ishq ko de tāna-e-bedād 'majāz'

tum ko to sirf isī baat pe mar jaanā thā

'aql ki sath se kuchh aur ubhar jaana tha

'ishq ko manzil-e-pasti se guzar jaana tha

jalwe the halqa-e-sar dam-e-nazar se bahar

main ne har jalwe ko paband-e-nazar jaana tha

husn ka gham bhi hasin fikr hasin dard hasin

un ko har rang mein har taur sanwar jaana tha

husn ne shauq ke hangame to dekhe the bahut

'ishq ke dawa-e-taqdis se Dar jaana tha

ye to kya kahiye chala tha main kahan se hamdam

mujh ko ye bhi na tha ma'lum kidhar jaana tha

husn aur 'ishq ko de tana-e-bedad 'majaz'

tum ko to sirf isi baat pe mar jaana tha