arbab-e-karam se badla hai dastur-e-gham-e-ayyam kahan

arbāb-e-karam se badlā hai dastūr-e-ġham-e-ayyām kahāñ

is daur-e-jahān-e-hastī meñ insān ko hai ārām kahāñ

duniyā hai jafāoñ kī shaidā duniyā ko vafā se kaam kahāñ

ai husn-e-vafā ke dīvāne letā hai vafā kā naam kahāñ

rahbar nazar aate haiñ rahzan tārīk dil aur māthe pe shikan

pūchho na haqīqat kuchh apnī ġhurbat meñ huī hai shaam kahāñ

ai tā.ir-e-ḳhush-āvāz abhī rahne de bahāroñ ke naġhme

shāyad ye tujhe ma.alūm nahīñ gulshan meñ bichhe haiñ daam kahāñ

rahbar na milā manzil na milī baaqī hai safar din ḳhatm huā

maiñ dekh rahā huuñ hasrat se jaltā hai charāġh-e-shām kahāñ

arbab-e-karam se badla hai dastur-e-gham-e-ayyam kahan

is daur-e-jahan-e-hasti mein insan ko hai aaram kahan

duniya hai jafaon ki shaida duniya ko wafa se kaam kahan

ai husn-e-wafa ke diwane leta hai wafa ka nam kahan

rahbar nazar aate hain rahzan tarik dil aur mathe pe shikan

puchho na haqiqat kuchh apni ghurbat mein hui hai sham kahan

ai tair-e-KHush-awaz abhi rahne de bahaaron ke naghme

shayad ye tujhe malum nahin gulshan mein bichhe hain dam kahan

rahbar na mila manzil na mili baqi hai safar din KHatm hua

main dekh raha hun hasrat se jalta hai charagh-e-sham kahan