are o be-murawwat tu kahan hai

are o be-muravvat tū kahāñ hai

taḌaptā hijr meñ ye nā-tavāñ hai

marīz-e-ishq kī tū le ḳhabar jald

ki vo ab koī dam kā mehmāñ hai

butoñ meñ sang-dil hai kaun tujh sā

tirī sañgīñ-dilī sab par ayaañ hai

ye sun kar haal merā hañs ke bolā

ayādat kī mujhe fursat kahāñ hai

butoñ ko narm-dil dekhā hai kis ne

suno sangīñ-dilī vasf-e-butāñ hai

na aaya zindagānī meñ jo vo shoḳh

ki martā huuñ dam-e-naz.a ravāñ hai

to phir vo aa chukā merī lahad par

yahī jab hāl-e-daur-e-āsmāñ hai

fanā hai ġhair-e-haq ko 'ājiz'-e-zār

baqā vasf-e-ḳhudā-e-do-jahāñ hai

are o be-murawwat tu kahan hai

taDapta hijr mein ye na-tawan hai

mariz-e-ishq ki tu le KHabar jald

ki wo ab koi dam ka mehman hai

buton mein sang-dil hai kaun tujh sa

teri sangin-dili sab par ayan hai

ye sun kar haal mera hans ke bola

ayaadat ki mujhe fursat kahan hai

buton ko narm-dil dekha hai kis ne

suno sangin-dili wasf-e-butan hai

na aaya zindagani mein jo wo shoKH

ki marta hun dam-e-naza rawan hai

to phir wo aa chuka meri lahad par

yahi jab haal-e-daur-e-asman hai

fana hai ghair-e-haq ko 'ajiz'-e-zar

baqa wasf-e-KHuda-e-do-jahan hai