aaj be-ap ho gae hum bhi

aaj be-āp ho ga.e ham bhī

aap ko pā ke kho ga.e ham bhī

daane kam the dukhoñ kī simran meñ

thoḌe motī piro ga.e ham bhī

der se the vo jis ke ghere meñ

usī jhurmuT meñ kho ga.e ham bhī

jā kai DhūñDā kahāñ kahāñ na tumheñ

jab na paayā to kho ga.e ham bhī

naam jiine kā jāgnā rakh kar

aaj be niiñd so ga.e ham bhī

ro.eñge gar to jag-hañsā.ī ho

karte kyā chup se ho ga.e ham bhī

haa.e re 'ārzū' kī be-āsī

aap be-bas the ro ga.e ham bhī

aaj be-ap ho gae hum bhi

aap ko pa ke kho gae hum bhi

dane kam the dukhon ki simran mein

thoDe moti piro gae hum bhi

der se the wo jis ke ghere mein

usi jhurmuT mein kho gae hum bhi

ja kai DhunDa kahan kahan na tumhein

jab na paya to kho gae hum bhi

nam jine ka jagna rakh kar

aaj be nind so gae hum bhi

roenge gar to jag-hansai ho

karte kya chup se ho gae hum bhi

hae re 'arzu' ki be-asi

aap be-bas the ro gae hum bhi