arsh o kursi ki KHabar lae hain lane wale

arsh o kursī kī ḳhabar laa.e haiñ laane vaale

ek muusā hī na the tuur ke jaane vaale

tuur ko tum ne jalāyā to baḌī baat na kī

aag paanī meñ lagāte haiñ lagāne vaale

mere marqad ko bhī aa kar kabhī Thukrā jaanā

are o fitna-e-mahshar ke jagāne vaale

ek aalam tire āshiq ne kiyā ḳhāl-e-siyāh

do hī naale kiye the tuur jalāne vaale

kab talak apne karishme hameñ dikhlāoge

ai miyāñ roz na.e tarz dikhāne vaale

merī taqdīr jo palTe to ta.ajjub kyā hai

sunte haiñ bigḌī banāte haiñ banāne vaale

tum jo āñkhoñ meñ mirī aa.e to ehsān kiyā

āñkheñ kyā dil meñ samāte haiñ samāne vaale

laakh ho māna-e-fariyād magar kyā hogā

arsh ko sar pe uThā leñge uThāne vaale

apnī qismat nahīñ aisī ki ho dīdār 'anjum'

muntazir jin ke haiñ kab aa.eñ vo aane vaale

arsh o kursi ki KHabar lae hain lane wale

ek musa hi na the tur ke jaane wale

tur ko tum ne jalaya to baDi baat na ki

aag pani mein lagate hain lagane wale

mere marqad ko bhi aa kar kabhi Thukra jaana

are o fitna-e-mahshar ke jagane wale

ek aalam tere aashiq ne kiya KHal-e-siyah

do hi nale kiye the tur jalane wale

kab talak apne karishme hamein dikhlaoge

ai miyan roz nae tarz dikhane wale

meri taqdir jo palTe to tajjub kya hai

sunte hain bigDi banate hain banane wale

tum jo aankhon mein meri aae to ehsan kiya

aankhen kya dil mein samate hain samane wale

lakh ho mana-e-fariyaad magar kya hoga

arsh ko sar pe uTha lenge uThane wale

apni qismat nahin aisi ki ho didar 'anjum'

muntazir jin ke hain kab aaen wo aane wale