arzan samajh agar gham-e-ulfat garan mile

arzāñ samajh agar ġham-e-ulfat garāñ mile

nuqsāñ nahīñ agar ivaz-e-naqd-e-jāñ mile

ai rāh-rau qadam na rakh is par ġhurūr se

ye ḳhaak vo hai jis meñ ka.ī kārvāñ mile

mil jaa.eñ kaash mujh ko kahīñ aur maiñ kahūñ

DhūñDā kahāñ kahāñ tumheñ aur tum kahāñ mile

hoñ dasht-o-koh yā chaman ai māder-e-vatan

jannat hai terā sāya-e-dāman jahāñ mile

us chand-roza ziist se jaan hai azaab meñ

kyuuñ kar kaTe jo zindagī jāvedāñ mile

ham kyuuñ kareñ zalīl jabīn-e-niyāz ko

shāyān-e-sajda jab na koī āstāñ mile

jab tak ḳhayāl-e-husn se ābād ho na dil

mumkin nahīñ zabān ko husn-e-bayāñ mile

milte rahe haiñ ham sho.arā-e-karām se

kam ahl-e-dil the beshtar ahl-e-zabāñ mile

'mahrūm' ho gayā safar-e-zindagī tamām

ab dekhiye qarār kī manzil kahāñ mile

arzan samajh agar gham-e-ulfat garan mile

nuqsan nahin agar iwaz-e-naqd-e-jaan mile

ai rah-rau qadam na rakh is par ghurur se

ye KHak wo hai jis mein kai karwan mile

mil jaen kash mujh ko kahin aur main kahun

DhunDa kahan kahan tumhein aur tum kahan mile

hon dasht-o-koh ya chaman ai mader-e-watan

jannat hai tera saya-e-daman jahan mile

us chand-roza zist se jaan hai azab mein

kyun kar kaTe jo zindagi jawedan mile

hum kyun karen zalil jabin-e-niyaz ko

shayan-e-sajda jab na koi aastan mile

jab tak KHayal-e-husn se aabaad ho na dil

mumkin nahin zaban ko husn-e-bayan mile

milte rahe hain hum shoara-e-karam se

kam ahl-e-dil the beshtar ahl-e-zaban mile

'mahrum' ho gaya safar-e-zindagi tamam

ab dekhiye qarar ki manzil kahan mile