asar hota nahin hai pattharon par

asar hotā nahīñ hai pattharoñ par

hameñ bhī naaz hai apne saroñ par

maiñ hiltī shāḳh se Dartā nahīñ huuñ

bharosā hai mujhe apne paroñ par

duā.eñ māñgtī rahtī haiñ nadiyāñ

umaD aate haiñ bādal sāgaroñ par

mujhe un bastiyoñ kī aarzū hai

jahāñ taale nahīñ milte gharoñ par

qalam kamzor paḌtā jā rahā hai

siyāsat chhā rahī hai shā.iroñ par

laḌe donoñ the hindū aur muslim

magar kis kā lahū thā ḳhanjaroñ par

agar ḳhud par bharosā hai to 'ulfat'

ubhar aate haiñ chehre pattharoñ par

asar hota nahin hai pattharon par

hamein bhi naz hai apne saron par

main hilti shaKH se Darta nahin hun

bharosa hai mujhe apne paron par

duaen mangti rahti hain nadiyan

umaD aate hain baadal sagaron par

mujhe un bastiyon ki aarzu hai

jahan tale nahin milte gharon par

qalam kamzor paDta ja raha hai

siyasat chha rahi hai shairon par

laDe donon the hindu aur muslim

magar kis ka lahu tha KHanjaron par

agar KHud par bharosa hai to 'ulfat'

ubhar aate hain chehre pattharon par