asar to jazba-e-zauq-e-darun mein hai magar kam-kam

asar to jazba-e-zauq-e-darūñ meñ hai magar kam-kam

shab-e-furqat ke māroñ ko hai ummīd-e-sahar kam-kam

fareb-e-husn tevar hī se zāhir hai ye dīvāne

haiñ andāz-e-bayān-e-husn se vāqif magar kam-kam

vahī hai zauq kā aalam hazāroñ nā-murādī par

magar aise bhī ahl-e-zauq aate haiñ nazar kam-kam

mizāj-e-husn adā-e-husn hī se haiñ samajh lete

haiñ aise bā-hunar kam-kam haiñ aise dīda-var kam-kam

kahāñ vo log jin ko paikar-e-mehr-o-vafā kahiye

agar haiñ bhī to kah liije ba-andāz-e-digar kam-kam

'zubair' aḳhbār-e-ālam par nazar har ik kī hai lekin

koī hai bā-ḳhabar kam-kam koī hai be-ḳhabar kam-kam

asar to jazba-e-zauq-e-darun mein hai magar kam-kam

shab-e-furqat ke maron ko hai ummid-e-sahar kam-kam

fareb-e-husn tewar hi se zahir hai ye diwane

hain andaz-e-bayan-e-husn se waqif magar kam-kam

wahi hai zauq ka aalam hazaron na-muradi par

magar aise bhi ahl-e-zauq aate hain nazar kam-kam

mizaj-e-husn ada-e-husn hi se hain samajh lete

hain aise ba-hunar kam-kam hain aise dida-war kam-kam

kahan wo log jin ko paikar-e-mehr-o-wafa kahiye

agar hain bhi to kah lije ba-andaz-e-digar kam-kam

'zubair' aKHbar-e-alam par nazar har ek ki hai lekin

koi hai ba-KHabar kam-kam koi hai be-KHabar kam-kam