اثر تو جذبۂ ذوق دروں میں ہے مگر کم کم

اثر تو جذبۂ ذوق دروں میں ہے مگر کم کم

شب فرقت کے ماروں کو ہے امید سحر کم کم

فریب حسن تیور ہی سے ظاہر ہے یہ دیوانے

ہیں انداز بیان حسن سے واقف مگر کم کم

وہی ہے ذوق کا عالم ہزاروں نا مرادی پر

مگر ایسے بھی اہل ذوق آتے ہیں نظر کم کم

مزاج حسن ادائے حسن ہی سے ہیں سمجھ لیتے

ہیں ایسے با ہنر کم کم ہیں ایسے دیدہ ور کم کم

کہاں وہ لوگ جن کو پیکر مہر و وفا کہئے

اگر ہیں بھی تو کہہ لیجے بہ انداز دگر کم کم

زبیرؔ اخبار عالم پر نظر ہر اک کی ہے لیکن

کوئی ہے با خبر کم کم کوئی ہے بے خبر کم کم