اشک آنکھوں میں بہانے کے لیے رکھے ہیں

اشک آنکھوں میں بہانے کے لیے رکھے ہیں

قیمتی موتی لٹانے کے لیے رکھے ہیں

ٹکڑے ٹکڑے تری تصویر نہیں کی ہے فقط

سن لے یہ خط بھی جلانے کے لیے رکھے ہیں

غیر کے ساتھ رفاقت ہے مگر ہم جیسے

بزم میں شعر سنانے کے لیے رکھے ہیں

ان پیادوں سے محبت ہی نہیں ہے تم کو

یہ تو بس جان گنوانے کے لیے رکھے ہیں

مجھ کو معلوم ہے یہ ہونٹ مرے گالوں پر

تو نے احسان جتانے کے لیے رکھے ہیں

کچھ منافق تو خدا تو نے ہماری صف میں

صرف احساس دلانے کے لیے رکھے ہیں

چند بوسے جو مرے نام کے ہوتے حمزہؔ

اس نے محفوظ زمانے کے لیے رکھے ہیں