ashk aankhon se dam-e-zabt rawan hota hai

ashk āñkhoñ se dam-e-zabt ravāñ hotā hai

jab koī dard haqīqat kī zabāñ hotā hai

ḳhuun ristā hai to aatī hai gul-e-surḳh kī yaad

zaḳhm dekheñ to bahāroñ kā gumāñ hotā hai

ham ne aslāf ke kirdār kiye haiñ zinda

varna tārīḳh ko ehsās kahāñ hotā hai

har qadam ġham kī salīboñ se guzarnā hogā

marhala dard kā āsān kahāñ hotā hai

ishq ehsās-o-kam-o-besh kā pāband nahīñ

jab havas ho to ġham-e-sūd-o-ziyāñ hotā hai

arsa-e-dahr meñ insāñ kī haqīqat ma.alūm

ek tinkā jo sar-e-āb-e-ravāñ hotā hai

sabza pāmāl gul afsurda chaman pazhmurda

kyuuñ ba-īñ-shakl bahāroñ kā gumāñ hotā hai

manzar-e-dard ne ehsās na rakkhā baaqī

dekh lete haiñ magar hosh kahāñ hotā hai

aap kī zarra-navāzī hai jo is qābil huuñ

varna shā.ir meñ koī vasf kahāñ hotā

ġham jo baḳhshā hai mujhe tū ne ġhazal kī sūrat

ḳhuun pī pī ke shab-o-roz javāñ hotā hai

fasl-e-gul meñ dil-e-vahshī kā chalan mat pūchho

aise mausam meñ to ye āfat-e-jāñ hotā hai

kaun 'anjum' ke muqābil hai sar-e-bazm-e-suḳhan

munfarid aap kā andāz-e-bayāñ hotā hai

ashk aankhon se dam-e-zabt rawan hota hai

jab koi dard haqiqat ki zaban hota hai

KHun rista hai to aati hai gul-e-surKH ki yaad

zaKHm dekhen to bahaaron ka guman hota hai

hum ne aslaf ke kirdar kiye hain zinda

warna tariKH ko ehsas kahan hota hai

har qadam gham ki salibon se guzarna hoga

marhala dard ka aasan kahan hota hai

ishq ehsas-o-kam-o-besh ka paband nahin

jab hawas ho to gham-e-sud-o-ziyan hota hai

arsa-e-dahr mein insan ki haqiqat malum

ek tinka jo sar-e-ab-e-rawan hota hai

sabza pamal gul afsurda chaman pazhmurda

kyun ba-in-shakl bahaaron ka guman hota hai

manzar-e-dard ne ehsas na rakkha baqi

dekh lete hain magar hosh kahan hota hai

aap ki zarra-nawazi hai jo is qabil hun

warna shair mein koi wasf kahan hota

gham jo baKHsha hai mujhe tu ne ghazal ki surat

KHun pi pi ke shab-o-roz jawan hota hai

fasl-e-gul mein dil-e-wahshi ka chalan mat puchho

aise mausam mein to ye aafat-e-jaan hota hai

kaun 'anjum' ke muqabil hai sar-e-bazm-e-suKHan

munfarid aap ka andaz-e-bayan hota hai