اشک بام چشم پر آنے لگا

اشک بام چشم پر آنے لگا

راز الفت بس کہ کھل جانے لگا

کیجیے کیا اس بت کافر کا جو

دل میں رہ کر دل کو تڑپانے لگا

کیا کہیں کتنی امیدیں بندھ گئیں

زلف کے خم جب وہ سلجھانے لگا

اس بت نوخیز کی نیرنگیاں

آئنہ بھی جس سے شرمانے لگا

زلف جو سلجھا نہ سکتا تھا کبھی

گتھیاں قسمت کی سلجھانے لگا

حشر میں بھی اس کی شوخی دیکھیے

مجھ کو آتا دیکھ کر جانے لگا

سعدیؔ ہو کیسے شب غم کی سحر

دل کو میں دل مجھ کو سمجھانے لگا