ashk-e-gham KHun-e-dil piye hain log

ashk-e-ġham ḳhūn-e-dil piye haiñ log

jaane kis kis tarah jiye haiñ log

aah siine meñ ik liye haiñ log

ġham abhī mo'atabar kiye haiñ log

mai-e-tishna-labī piye haiñ log

phir bhī ḳhud ko liye diye haiñ log

chaak har fasl-e-gul meñ hotā hai

jeb-o-dāmāñ ko kyā siye haiñ log

lau kahāñ sirf kuchh uThe hai dhuāñ

muflisoñ ke bujhe diye haiñ log

sāhabo jām-e-jam kī ḳhair manāo

yuuñ lage hai ki kuchh piye haiñ log

dil ye bole hai sang hī hoñge

dast-e-ḳhālī meñ kuchh liye haiñ log

kitnī sadiyoñ se pā rahe haiñ sazā

kaisā jurm-e-vafā kiye haiñ log

'mīr' kā jaam aur 'shafīq' kī mai

ḳhuub jī khol kar piye haiñ log

ashk-e-gham KHun-e-dil piye hain log

jaane kis kis tarah jiye hain log

aah sine mein ek liye hain log

gham abhi mo'atabar kiye hain log

mai-e-tishna-labi piye hain log

phir bhi KHud ko liye diye hain log

chaak har fasl-e-gul mein hota hai

jeb-o-daman ko kya siye hain log

lau kahan sirf kuchh uThe hai dhuan

muflison ke bujhe diye hain log

sahabo jam-e-jam ki KHair manao

yun lage hai ki kuchh piye hain log

dil ye bole hai sang hi honge

dast-e-KHali mein kuchh liye hain log

kitni sadiyon se pa rahe hain saza

kaisa jurm-e-wafa kiye hain log

'mir' ka jam aur 'shafiq' ki mai

KHub ji khol kar piye hain log