ashk-e-gham mujhko bahar-surat chhupana hi paDa

ashk-e-ġham mujh ko bahar-sūrat chhupānā hī paḌā

aap ne jab haal pūchhā muskurānā hī paḌā

un ko majbūran naqāb-e-ruḳh uThānā hī paḌā

jur.at-e-ahl-e-nazar ko āzmānā hī paḌā

vaa.e majbūrī mazāq-e-barq kī taskīn ko

āshiyāna phir gulistāñ meñ banānā hī paḌā

aaj vo be-dard āmāda hai sunñe ke liye

qissa-e-dard-e-mohabbat ab sunānā hī paḌā

thā jo ehsās-e-mohabbat kī nazākat kā ḳhayāl

apnā dāman un ke hāthoñ se chhuḌānā hī paḌā

dīdanī haiñ ye mohabbat kī karishma-sāziyāñ

un ko mujh par zulm kar ke muskurānā hī paḌā

dard-e-dil kuchh rang lā.egā mujhe ma.alūm thā

aap ko āḳhir mirī manzil tak aanā hī paḌā

un kī badnāmī kā andesha rahā pesh-e-nazar

intihā-e-dard-o-ġham meñ muskurānā hī paḌā

ho ga.e majbūr yuuñ jalva dikhāne ke liye

dil banāne ke liye dil ko miTānā hī paḌā

dekh kar sehn-e-gulistāñ meñ bahāroñ kā hujūm

hazrat-e-vā.iz ko bhī sāġhar uThānā hī paḌā

jazba-e-be-iḳhtiyār-e-shauq se majbūr the

'sājid' un ke āstāñ par sar jhukānā hī paḌā

ashk-e-gham mujh ko bahar-surat chhupana hi paDa

aap ne jab haal puchha muskurana hi paDa

un ko majburan naqab-e-ruKH uThana hi paDa

jurat-e-ahl-e-nazar ko aazmana hi paDa

wae majburi mazaq-e-barq ki taskin ko

aashiyana phir gulistan mein banana hi paDa

aaj wo be-dard aamada hai sunne ke liye

qissa-e-dard-e-mohabbat ab sunana hi paDa

tha jo ehsas-e-mohabbat ki nazakat ka KHayal

apna daman un ke hathon se chhuDana hi paDa

didani hain ye mohabbat ki karishma-saziyan

un ko mujh par zulm kar ke muskurana hi paDa

dard-e-dil kuchh rang laega mujhe malum tha

aap ko aaKHir meri manzil tak aana hi paDa

un ki badnami ka andesha raha pesh-e-nazar

intiha-e-dard-o-gham mein muskurana hi paDa

ho gae majbur yun jalwa dikhane ke liye

dil banane ke liye dil ko miTana hi paDa

dekh kar sehn-e-gulistan mein bahaaron ka hujum

hazrat-e-waiz ko bhi saghar uThana hi paDa

jazba-e-be-iKHtiyar-e-shauq se majbur the

'sajid' un ke aastan par sar jhukana hi paDa