اشک غم سے شکوۂ بیداد کر لیتا ہوں میں

اشک غم سے شکوۂ بیداد کر لیتا ہوں میں

بے زباں تو ہوں مگر فریاد کر لیتا ہوں میں

جب شباب و حسن ان کا یاد کر لیتا ہوں میں

اک جہان رنگ و بو آباد کر لیتا ہوں میں

جب کبھی ترک محبت کی صدا دیتا ہے دل

آپ کی پہلی وفائیں یاد کر لیتا ہوں میں

آرزوئے دید سے دل کو ہجوم یاس سے

شاد کر لیتا ہوں میں ناشاد کر لیتا ہوں میں

شب غم سے در حقیقت عشق کی ہوتی ہے قدر

آشیاں میں یوں قفس کو یاد کر لیتا ہوں میں

ہوتی ہے محسوس جب ان کی جفاؤں میں کمی

خود بخود تازہ ستم ایجاد کر لیتا ہوں میں