ashk-e-gul-rang nisar-e-gham-e-jaanana karen

ashk-e-gul-rañg nisār-e-ġham-e-jānāna kareñ

aaj terī hī ḳhushī ai dil-e-dīvāna kareñ

dard-mandoñ se ye kah do ki bā-ā.īn-e-niyāz

dil ko zauq-karam yaar se begāna kareñ

taaki āsūda-e-hirmāñ dil-e-ġham-kosh na ho

do ghaḌī zikr-e-mai-o-sāqī-o-paimāna kareñ

bū-e-ḳhush terī nahīñ jin ke mashām-e-jāñ meñ

rañg-o-nik.hat kā guloñ ko vahī paimāna kareñ

ka.aba-o-dair-o-kalīsā kī fazāoñ se alag

aao ta.amīr mohabbat kā jilau-ḳhāna kareñ

itnī fursat hī kahāñ hai ki tire soḳhta-jāñ

jalne marne meñ ham-āhañgī-e-parvāna kareñ

apnī hastī kī faqat itnī hai rūdād 'asar'

jaise mansūb haqīqat se ik afsāna kareñ

ashk-e-gul-rang nisar-e-gham-e-jaanana karen

aaj teri hi KHushi ai dil-e-diwana karen

dard-mandon se ye kah do ki ba-ain-e-niyaz

dil ko zauq-karam yar se begana karen

taki aasuda-e-hirman dil-e-gham-kosh na ho

do ghaDi zikr-e-mai-o-saqi-o-paimana karen

bu-e-KHush teri nahin jin ke masham-e-jaan mein

rang-o-nikhat ka gulon ko wahi paimana karen

kaba-o-dair-o-kalisa ki fazaon se alag

aao tamir mohabbat ka jilau-KHana karen

itni fursat hi kahan hai ki tere soKHta-jaan

jalne marne mein ham-ahangi-e-parwana karen

apni hasti ki faqat itni hai rudad 'asar'

jaise mansub haqiqat se ek afsana karen