اشک خوں درد کے غماز نظر آتے ہیں

اشک خوں درد کے غماز نظر آتے ہیں

فاش ہوتے مرے سب راز نظر آتے ہیں

وسعت دہر میں ہر چشم حقیقت بیں کو

ہر طرف عشق کے اعجاز نظر آتے ہیں

یہ مہ و مہر یہ انجم یہ زمیں اور یہ فلک

میرے روٹھے ہوئے دم ساز نظر آتے ہیں

منتظر اہل نظر کے ہیں یہ غنچے شاید

ہمہ تن گوش بر آواز نظر آتے ہیں

غم جاناں کو بھلا دے گا دلوں سے جیسے

غم دوراں کے یہ انداز نظر آتے ہیں

ساز فطرت پہ لرزتے ہیں جو غمگیں نغمے

کسی غم دیدہ کی آواز نظر آتے ہیں

نت نئے علم و ہنر کے یہ کرشمے فرحتؔ

کسی طوفان کا آغاز نظر آتے ہیں