ashk-e-KHun dard ke ghammaz nazar aate hain

ashk-e-ḳhūñ dard ke ġhammāz nazar aate haiñ

faash hote mire sab raaz nazar aate haiñ

vus'at-e-dahr meñ har chashm-e-haqīqat-bīñ ko

har taraf 'ishq ke e’jāz nazar aate haiñ

ye mah-o-mehr ye anjum ye zamīñ aur ye falak

mere rūThe hue dam-sāz nazar aate haiñ

muntazir ahl-e-nazar ke haiñ ye ġhunche shāyad

hama-tan gosh-bar-āvāz nazar aate haiñ

ġham-e-jānāñ ko bhulā degā diloñ se jaise

ġham-e-daurāñ ke ye andāz nazar aate haiñ

sāz-e-fitrat pe larazte haiñ jo ġhamgīñ naġhme

kisī ġham-dīda kī āvāz nazar aate haiñ

nit-na.e ilm-o-hunar ke ye karishme 'farhat'

kisī tūfān kā āġhāz nazar aate haiñ

ashk-e-KHun dard ke ghammaz nazar aate hain

fash hote mere sab raaz nazar aate hain

wus'at-e-dahr mein har chashm-e-haqiqat-bin ko

har taraf 'ishq ke e’jaz nazar aate hain

ye mah-o-mehr ye anjum ye zamin aur ye falak

mere ruThe hue dam-saz nazar aate hain

muntazir ahl-e-nazar ke hain ye ghunche shayad

hama-tan gosh-bar-awaz nazar aate hain

gham-e-jaanan ko bhula dega dilon se jaise

gham-e-dauran ke ye andaz nazar aate hain

saz-e-fitrat pe larazte hain jo ghamgin naghme

kisi gham-dida ki aawaz nazar aate hain

nit-nae ilm-o-hunar ke ye karishme 'farhat'

kisi tufan ka aaghaz nazar aate hain