اشک مظلوم پہ یہ سوچ کے خنداں ہونا

اشک مظلوم پہ یہ سوچ کے خنداں ہونا

وقت قطروں کو سکھا دیتا ہے طوفاں ہونا

میں پریشاں ہوں ضروری تھا پریشاں ہونا

کیونکہ اک جرم ہے اس دور میں انساں ہونا

ویسے ہی عالم ہستی پہ ہیں غم کے سائے

اور پھر آپ کی زلفوں کا پریشاں ہونا

پھر کسی ظلم کی بنیاد پڑی ہے لوگو

بے سبب تو نہیں ظالم کا پشیماں ہونا

میرے حالات پریشاں کو دعائیں دیجے

آ گیا آپ کی زلفوں کو پریشاں ہونا

چارہ گر یوں مجھے تسکین دئے جاتے ہیں

جیسے ممکن ہے مرے درد کا درماں ہونا

خار ہیں لالہ و گل اس کی نظر میں رونقؔ

جس نے دیکھا ہے گلستاں کا بیاباں ہونا