ashk-e-mazlum pe ye soch ke KHandan hona

ashk-e-mazlūm pe ye soch ke ḳhandāñ honā

vaqt qatroñ ko sikhā detā hai tūfāñ honā

maiñ pareshāñ huuñ zarūrī thā pareshāñ honā

kyūñki ik jurm hai is daur meñ insāñ honā

vaise hī ālam-e-hastī pe haiñ ġham ke saa.e

aur phir aap kī zulfoñ kā pareshāñ honā

phir kisī zulm kī buniyād paḌī hai logo

be-sabab to nahīñ zālim kā pashemāñ honā

mere hālāt-e-pareshāñ ko duā.eñ diije

aa gayā aap kī zulfoñ ko pareshāñ honā

chārāgar yuuñ mujhe taskīn diye jaate haiñ

jaise mumkin hai mire dard kā darmāñ honā

ḳhaar haiñ lāla-o-gul us kī nazar meñ 'raunaq'

jis ne dekhā hai gulistāñ kā bayābāñ honā

ashk-e-mazlum pe ye soch ke KHandan hona

waqt qatron ko sikha deta hai tufan hona

main pareshan hun zaruri tha pareshan hona

kyunki ek jurm hai is daur mein insan hona

waise hi aalam-e-hasti pe hain gham ke sae

aur phir aap ki zulfon ka pareshan hona

phir kisi zulm ki buniyaad paDi hai logo

be-sabab to nahin zalim ka pasheman hona

mere haalat-e-pareshan ko duaen dije

aa gaya aap ki zulfon ko pareshan hona

chaaragar yun mujhe taskin diye jate hain

jaise mumkin hai mere dard ka darman hona

KHar hain lala-o-gul us ki nazar mein 'raunaq'

jis ne dekha hai gulistan ka bayaban hona