ashk mein Dubti phir arz-e-tamanna dekhun

ashk meñ Dūbtī phir 'arz-e-tamannā dekhūñ

raat bhar ḳhvāb meñ ik ḳhvāb sisaktā dekhūñ

koī paiġhām na hī ḳhat na koī ḳhair ḳhabar

koī ummīd nazar aa.e to rastā dekhūñ

us ko takte hue maiñ us meñ hī tabdīl huā

koī batlā.e use aur maiñ kitnā dekhūñ

jab bhī dekhā hai faqat daaġh nazar aa.e mujhe

kitnī hasrat thī tirā chāñd sā chehra dekhūñ

kyā milā jal ke tujhe 'ishq meñ ai dil mere

is se behtar thā tujhe taaq pe jaltā dekhūñ

bhuuk mahñgā.ī ġharībī ye muqaddar ke sitam

ab savāl āḳhirash in āñkhoñ se kyā kyā dekhūñ

ek zarre ko kahāñ chāñd kī āġhosh nasīb

merī auqāt kahāñ aap kā sapnā dekhūñ

jī meñ aatā hai 'karan' marne se pahle maiñ kabhī

ḳhud ko ik baar bas ik baar to zinda dekhūñ

ashk mein Dubti phir 'arz-e-tamanna dekhun

raat bhar KHwab mein ek KHwab sisakta dekhun

koi paigham na hi KHat na koi KHair KHabar

koi ummid nazar aae to rasta dekhun

us ko takte hue main us mein hi tabdil hua

koi batlae use aur main kitna dekhun

jab bhi dekha hai faqat dagh nazar aae mujhe

kitni hasrat thi tera chand sa chehra dekhun

kya mila jal ke tujhe 'ishq mein ai dil mere

is se behtar tha tujhe taq pe jalta dekhun

bhuk mahngai gharibi ye muqaddar ke sitam

ab sawal aaKHirash in aankhon se kya kya dekhun

ek zarre ko kahan chand ki aaghosh nasib

meri auqat kahan aap ka sapna dekhun

ji mein aata hai 'karan' marne se pahle main kabhi

KHud ko ek bar bas ek bar to zinda dekhun