اشک میں ڈوبتی پھر عرض تمنا دیکھوں

اشک میں ڈوبتی پھر عرض تمنا دیکھوں

رات بھر خواب میں اک خواب سسکتا دیکھوں

کوئی پیغام نہ ہی خط نہ کوئی خیر خبر

کوئی امید نظر آئے تو رستا دیکھوں

اس کو تکتے ہوئے میں اس میں ہی تبدیل ہوا

کوئی بتلائے اسے اور میں کتنا دیکھوں

جب بھی دیکھا ہے فقط داغ نظر آئے مجھے

کتنی حسرت تھی ترا چاند سا چہرہ دیکھوں

کیا ملا جل کے تجھے عشق میں اے دل میرے

اس سے بہتر تھا تجھے طاق پہ جلتا دیکھوں

بھوک مہنگائی غریبی یہ مقدر کے ستم

اب سوال آخرش ان آنکھوں سے کیا کیا دیکھوں

ایک ذرہ کو کہاں چاند کی آغوش نصیب

میری اوقات کہاں آپ کا سپنا دیکھوں

جی میں آتا ہے کرنؔ مرنے سے پہلے میں کبھی

خود کو اک بار بس اک بار تو زندہ دیکھوں